Minista gwoondolopa nomapendulopo gokomikunda James Sankwasa okwa popi kombinga yonkalo yokutala ko omikunda dhomoNamibia dha hepa.
Okwa popi kutya aakwashigwana yomomikunda ohaya dhana onkandangala onene mokutekula oondolopa nonkene oya pumbwa okutumbalekwa medhanonkandangala lyawo meliko lyoshilongo.
Pethimbo lyoshituthi sha ningilwa koshiputudhilo shaInternational University of Manangements, mEtitatu lya zi ko, minister okwa popi kutya Aanamibia oya pumbwa okwiipula kombinga ya nkene ya tala ko oluhepo, elongo osho wo omapendulopo.
"Aluhe oho uvu omuntu ta popi kutya omikunda odha hepa, aantu yokomikunda oya hepa," osho a popi ngaaka.
Sankwasa okwa pula kutya ngiika ohashi ende ngiini opo aantu yomoondolopa ya kale ye wete ya huma omanga haya hupile miilongomwa hayi zi komikunda.
" Olye a hepa moNamibia? " Iitopolwa yokomikunda? " Iitopolwa yokoondolopa? " Shaashi aakalimo yomoondolopa ngaashi ngoye nongame, otuna ooShoprite. " "Oko hatu landa omahini getu, iikwamboga, omayi osho wo omatama," osho a popi ngaaka.
"Ashike inandi mona nale ongombe tayi etwa mOvenduka. " Inandi mona mo nale ondjuhwa mOvenduka.
Oshoka mbyoka iinima mbyoka hatu landa okuza komikunda, Onkene iitopolwa yokomikunda oyo hayi eta iinima koondolopa, ashike onkene ngaa hatu tsikile nokupopya kutya iitopolwa yokomikunda oya hepa omanga iitopolwa yomoondolopa iikengeli.
Omuntu ngu te ku pe iinima ota kala nee ngiini oye a hepa omanga ngoye omukengeli?
Okwa popi kutya omulandu gwelongo moshilongo nagu kale tagu tungu po onkalo yaantu taya longwa ye kiilongele opo shi pitike aagundjuka yi ilongele kuyoyene peha lyokukonga iilonga.
Minista okwa popi kutya okwa nongele nkene aatungi, aalongi yominino dhoonyata osho wo yilwe tayi longwa kaakwiilongo pomatungo moNamibia nokwa pula kutya ontseyo ndjoka oye yi adha peni.
Okwa popi kutya kiilongo yimwe ohaku gandjwa elongo ndyoka hali gandja ontseyo kaailongi ya vule okutameka taya longo mbala uuna ya mana omailongo gawo.
Omulandu gwelongo muAfrika ogwa pumbwa okulundululwa opo gu shilipaleke kutya aalongwa oya mona ontseyo ndjoka tayi pumbiwa momidhingoloko dhawo osho wo meliko lyoshilongo, osho Sankwasa a popi ngaaka.
Itatu vulu okukandulapo omaupyakadhi gongashingeyi nogomonakuyiwa nomakandulopo gomikundu gohela. Otwa pumbwa okuhuma komeho,
, osho a popi ngaaka.
